پاکستان ریلوے مسلسل دوسرے سال بھی منافع میں

وزارت ریلوے پاکستان نے انکشاف کیا ہے کہ پاکستان ریلوے نے مالی سال 2024-25 میں 2 ارب 41 کروڑ روپے منافع حاصل کیا، جو ایک اہم مالی پیش رفت ہے۔

یہ اعداد و شمار قومی اسمبلی کے وقفہ سوالات کے دوران جمع کروائے گئے تحریری جواب میں پیش کیے گئے، جس میں ادارے کی بہتر کارکردگی کو اجاگر کیا گیا۔

رپورٹ کے مطابق پاکستان ریلوے کی مجموعی آمدن 93 ارب 60 کروڑ روپے رہی جبکہ اخراجات 91 ارب 18 کروڑ روپے رہے، جس کے نتیجے میں خالص منافع حاصل ہوا۔

یہ کامیابی اس لیے بھی اہم ہے کیونکہ تاریخ میں پہلی بار پاکستان ریلوے نے مسلسل دوسرے سال منافع کمایا ہے۔

مالی سال 2022-23 میں ادارے کو 8 ارب 46 کروڑ روپے خسارہ ہوا تھا، تاہم گزشتہ دو سال میں اصلاحات کے ذریعے خسارہ ختم کر دیا گیا۔

حکام کے مطابق مسافر اور مال بردار ٹرینوں کی آمدن میں نمایاں اضافہ ہوا، جس کے باعث پہلی بار مجموعی آمدن 93 ارب روپے سے تجاوز کر گئی۔

حکام نے اس عزم کا اظہار کیا کہ ادارے کی مالی پوزیشن مزید مستحکم بنانے کے لیے اقدامات جاری رکھے جائیں گے تاکہ طویل مدتی بہتری یقینی بنائی جا سکے۔